Tedong sola Lalin

Den sangallo na male tu Tedong dio lu to' uma ungkande dalame. Natiromi tu lalin, napa'kadaimi nakua: "Apa toda iko mu ala inde te lalin. Disangako lumingka apa mengguririk-guririk bang roko indete uma sangtempe'. La mubelaraka tu susi aku mintu' padang ku olai nasang." Mebali tu lalin nakua: "Mutelle-tele bangna' dikka'. Dadi moi angku bitti' sia tang kubela lumingka, apa morai siana' ussilombangko ma'dondo." Natelle-telle pissanmi tedong nakua: "Umba tu la tanii silomba lalin." Mebali lalin nakua: "Iko ia undullui umba tu la tanii silomba." Nakuami tedong: "Io, ke'de' indeki' to' uma, talambanni to salu inde dio, takendek langngan to' tanete sambali', tamane sule dao mai sae indete to' uma tanii ke'de'. Mukadoiraka to lalin?" Mebali lalain nakua : "Io, kadona', take'de'mo." Ia tonna lake'de'mo mella'ka' mi tu lalin lako to' lentek dolona tedong apa tae' natiroi tedong belanna dongnga' tu Tedong umpemaranga lalan la naolai. Natonganni mi ma'dondo tu tedong sae lako biring salu, anna tadang sattu' namekutana: "Umbako lalin." Ullessuran mi kalena tu lalin dio mai lentekna tedong namebali nakua: "Indemo' tingayomu, ina' pa kusae." mangka to mella'ka' pela'omi tu lalin lako lentek tedong. Nasanta' pissanmi tedong ma'dondo tuka' langngan tanete anna tadang sattu' do belanna seka-sekamo. Mekutana mi nakua: "Umbamoko lalin?" lessuranomi kalena tu lalin doi mai lentek tedong anna mebali nakua: "Indemo' tingayomu, ina'pa ku sae." sasaomi tu lalin mella'ka' lako lentek dolona tedong. Nasanta'omi tedong ma'dondo do mai tenete la sule rokko to' uma nanii ke'de'. Ia tonna rampomo diong to' uma nanii ke'de', metambami tu tedong nakua: "Umbamoko lalin?" ullesuranmi kalena te lalin dio mai lentekna tedong anna sasa mebali nakua: "Indemo' tingayomu, ina'pa kukampaiko" Masiri'mi tu tedong belanna nasanga tongan nasau' tira' lalin. Mangka to sengkemi nala undokko'i tu lalin la napalanggan illongna, apa mallai tu lalin membuni tama kalo'tok dio biring uma. "Orang besar yang angkuh tetapi bodoh, Sering dipermalukan oleh orang kecil yang cerdik."

Posted in: Ulelean Pare