Ula' Saa Na Tedong

Ia tu ula' saa ussanga bang kalena kumua mandalan tangnga'na sia ia mo datunna mintu' ula'. den sangngallo tonna tangdia' tonganmonasa'ding, la morai mi undaka' tau tu la na ampello'. Undaka' mi tannga' umba la nakua unnappa' tau. Na tiro mi dio biring pangngala' tu nanii torro, den Tedong marassan kumande. Malemi na pentireke'i ula' saa to tedong anna pa'kadai nakua "E, Tedong, pussak na' aku untiroko, iko kapua kalemu, iko den tandukmu. Tae' bang lalan la nanii to lino unnea ko sia untaloiko. uma iko mukua ammu benganni sia mupatanan bang tu illongmu nato'tok to lino?"

mebali mi ia tu tedong nakua "Tang dilambi' tu tangnga'na to lino ula' saa." Na kua omi tu ula' saa "Tambanan na' ke tu to lino kutiroi tu tangnga'na." ia sia na ma'kada susito tu ula' saa belanna la morai liumo unnampello' tau. malemi tu tedong untambai tu to lino anna sae tonga. Tonna saemo tu to lino, nakuami ula' saa "E tolino, pakitanna' ke tu tangnga'mu. Dako' pa ku pakitan dukako tu tangnga'ku". mebali tu tolino nakua "Io". Na suami to lino tu ula' saa sumpanndan siunduk batang kayu songka. Na alai tu pepori na pasipori batang kayu tu kalena ula' saa, sangpulodua porinna. Tang naissan liumi pukkedo tu ula' saa. mangka to malemi natampe tolino. saemi tu tedong umpetaa-taai tu ula' saa nakua "Mutiromoraka pole' tu tangnga'na to lino. Mula ma'apamora, tang muissanmo pukkedo, manda' porimmu. Sia tang kuissan la untunduiko. La kukeke' tu porimmu naiko tu la bangke, la kusendokko tandukku na iko tu la na tossok."

Lembo' bangmi elo'na tu tedong umpeta-taai ula' saa na urunganni ronno' tu isi daona lu tu tedong. Iamoto natae'mo isi daona lu tu tedong. Na ia tu ula' saa mari'pi bang dio inanna sae lako matena.

"siapa yang menggali lubang akan jatuh ke dalamnya
yang memakai akal busuk untuk mencelakakan orang lain.
akan menanggung akibatnya"

Posted in: Ulelean Pare